نورتينا يا ( سماهر ) ...!!
(قسوم ) جارنا ده عندهم بت بتهم جايبنها من أمريكا قالو تقرا الجامعة هنا في السودان خوفا من التجاذبات الفكرية والاستلاب الثقافي والقصص دي ...!!
اها من ( تكساس ) طوالي علي حلتنا دي ...( دايركت فلايت ) ..!! ابوها قال خايف عليها من ( الانزلاق ) في مستنقع العولمة ....!! أناخايفا (تنزلق ) هنا في موية المطرة دي ....!!!
المهم يازول بنو ليك ليها ديك يالأوضة في نص بيت ناس (قسوم )
قالو عشان تحس بالخصوصية وتقعد محترمة ...!! قسوم ده راجل خالتا ...زول طيبان كدا وفِي حالو ولذيذ جنو ضحك...!! بس مركز مع اولادو ديل... يشاغلم ويشاغلو .... ورضيااان بالقسمة ....وقاعد ....!!! قسوم ماشه معاهو باسطة مع (المعونات الامريكية ) دي ....!!! أهو جاتو أوضة في صمة خشمو وركبو ليك فيها داك يالمكيف ال LG وفاتورة الكهربا طبعا من أمريكا .....!!
(قسوم كان ركب ( سبيلت ) ....( الجمرة الخبيثة ) كان حرقتو هو ذاتو ...) ...!!!
وتعهد الرجل بتوفير كل الدعم والحماية ( للمبعوث الامريكي ) الجاي ده ....!!! ( الدعم المعنوي طبعا ) ....
واكتملت الاستعدادات لاستقبال ( سماهر ) ...!! ( ده اسم البت ...!! ) ...!!! شوف الاسم ذاتو ( بلمع ) كيف ....!! (انتو الناس دي بتلقي الأسماء دي وين ....!!! )
اها ناس (قسوم ) ديل شغالين بروفات كم يوم بس عشان يحفظو الاسم ده بس ....!!! وفِي النهاية حاجه (الروضة ) اللي هي أم مرتو وحبوبة سماهر ...بتقول ...( مساير ) ...!!!
واخيرا ( الكونتيسة ) في طريقها للخرطوم حجزو ليها يوم عشرين وكلو جاهز ...!! الاوضة واقفة في نص البيت ذي ( السفارة الامريكية ) يزورو فيها ...!!! (الوحيدة المسلحة .....!! ) ....!! باقي البيت ...!! زنك..!! ( انه الدولار عندما يتكلم ....!! وفِي بعض الأحيان يمشي ) ...!!
اها يوم عشرين مافضل زول ..البيت كلو اتخمخم مشي المطار...!!! (شوف جنس الطيبة دي ذاتا كيف ...!! )
قسوم ( قسيم الريد ) ...وأفراد الاسرة الكريمة....!!! قسوم عندو تلاته بنات ...!! واحده أكبر من (سماهر ) دي اسمها( وجدان ) واتنين أصغر وتلاته اولاد صغار وأم مرتو وحبوبة سماهر (حاجه الروضة ) ديل كلهم في البيت ده ....(دي بيوت الرضا بتشيل بس ...!! مابتعد ....) ....!!!
المهم بسلامتم الي هناك ... ويالمطار جاك زول ...!! هي ذاتا اتخلعت ....!!! لمو ليك فيها سلام (ملخو ) يدها .....!! وتواصلت الاحتفالات حتي البيت ...!! ادوها العصير سألتم من (المصاصة ) ...!! زووول قال ليها بتقولي في شنو مافي .....!! ولد قسوم الصغير ده اسمو (عكرمة ) سامع ليك (سماهر ) جاية ...!! ( وسماهر) جات ...!! ودي أوضة ( سماهر ....) ....اها يشيل ويتفرج ليك في ( سماهر ) دي للدنيا والزمان متابعا ليك من المطار ...!! ومرات يديها هبشا كدا قايلا بت لعاب... وعلي الانجليزي العليها زولك اقتنع ......!!! طبعا (سماهر ) العربي يخربا ....!!! كلمتين تلاته بس ...!! اها وكت لقت (عكرمة ) ده مهتمي بيها قدر ده ....حبت تلاطفو شوية ....قالت لي ...( واتز يور نيم ....!! ) بقي يتلفت التقول طقشتو ركشه ....!! اها (وجدان ) اختو دي غايتو تشيل وتترجم حسب قدرتا ...قالت ليهو ..قالو ليك اسمك منو ....!!
أدا نخرتو حكة كدا ....!! وجرا رداهو (الناصل) ده ...!! وقال ليها (عكرمة ) ....!!! سماهر قالت ليهو اوووو نايس نيم ( كركمةً ) ...!!! الود فطس من الضحك داير يدردق .....!!!
(وايقن لحظتها ان هذا الزائر الجديد من كوكب اخر ...) ...!!! لكن ماهو مؤكد الان ان ( سماهر ) خرجت من كبسولتها الفضائية الي عالم جديد تلتحم فيه بالأرض ) ....
قالت ليهم انتو كلكم اخوان ..!!؟ قالو ليها ايوا...!!؟ قالت ليهم وليي كتار كدا ....!!!؟ ( طبعا دي صراحة الأمريكان .....!!! ) قهرتك بالقاهر والنبي الطاهر ....!!! شبكوها ليك قولي ماشاءالله......!!! وهي شغالة ليك ( ان شاءالله....!! ) ( دي الوحيدة الحافظاها....!!! ) ...(قسوم ) يشيل ويقرا ليها في وشها وهي ماجايبا خبر ...!! قال الله يستر علينا من عين النصرانية دي ....!!!
اها ( سماهر ) استأذنت منهم دخلت تنوم ...!!! مهدودة المسكينة ...!! ( ستاشر ساعة طيران وساعتين سلام واحضان ....!! ) وهم مستغربين في النوم البياخدو لي إذن ده ....!!! قبل كده ( عكرمة ) ده نام في ( المزيرة) للصباح زول جاب خبرو مافي ...!!!
بس تاني يوم ذي الساعة تسعة كده صحت ليك بي شباك اوضتا ده بيضرب لُب لُب لُب ...!! جات مارقا جارية جري بي هدوم النوم وتكورك ...واتز رونغ ...!!؟؟ ازت افاير ...!!؟؟ قايلاها حريقه .....!!! لكن هم ذاتم بالغو ...(.الخبيت ) ده شنو كمان ....!!!
غايتو اتحرجو شوية كدا ...!! قالو ليها لا مافي عوجه بس الفطور ...!!!!! قالت ليهم whaaaaat ..!!!!! عندهم ولدم ألفي النص ده مسلط كدا اسمو (مصطفي ) عرفا مافاهمة حاجه .... أشر ليها علي خشمو ..قال ليها أكل ... أكل .....!!! ( غايتو ده الوحيد البعرف لغات في البيت ده ....) قالت ليهو بي دهشة كدا ... ( يو مين بريك فاست ....!!؟ ) ...هو بالإحساس كدا قال ليها أيوا ..أيوا ..
بس قالت كدا اتلفتت ...!!! وانفصمت ليك فيهم....!! المرة دي بالانجليزي الصاح الأصلي داك بتاع الأفلام ....!!! رصتو رص ....(ياعديمين الذوق والإنسانية ... ياما مهذبين ...!!! انتو مش ناس غريبين ...!!؟؟ ده شنو العملتو ده ...!! معقولة بس في شخص طبيعي ممكن يعمل كده... !!! دي كان صحوها بي رصعة مخدة كان ماتت ) ...!!
شبكتكم ليك ...ياظلما يامجرمين ....!! ماخلت ليهم صفحة ...في محاضرة مكتملة الأركان عن الذوق والاتيكيت ...!!! ) ...!! غايتو الكويسة زووول فاهم حاجه مافي كان ....طردوها...
قالت ليهم
( اني وي ...ثانكيو ...اَي برنغ وَز مي ..ماي فودز
دونت نيد ...!!! ) ...!!
الجماعة يتلفتو ماعرفوها قاصدة شنو.... اضطرت تستعمل سلاح ( الإشارة ) ...!! اشرت ليهم علي شنطا وخشما وقفلت الباب .....!!
( ولكن هل سيكفي هذا المخزون الاستراتيجي لبقية العام ياصغيرتي) ...!!!
المهم غايتو سماهر ( سايحة ) بس تشيل وتعاين ليك في الناس كل مايجو ضيوف يطلعوها ذي ( البترينة ) يشوفوها ويرجعوها تاني .....!! قسوم مبسوط بسطة قال والله البت دي جات بي خيرا ...!!! (البسمعو يقول ابوها ...!! ) ....!!!
اها ناس ( قسوم ) ديل عندهم بيت ( جداد ) جوه البيت ....!! ده بقي المكان المفضل لي ( سماهر ) متابعة ليك الجداد ده بالحته تحلف تقول ولدتو من بطنا ....!!! ومستغربا كيف (حايم ) كدا بين الناس ....🐓 ....لقت ليك حبوبتا ( حاجه الروضة ) دي متوهطا في نص العنقريب بتورق لبها في خدره ....!!!
وتحت الصينية لافات جدادتين ذي ( الأتوس ) ....قالت ليها بالإنجليزي .....(إنّو إنتي مرا عظيمة البتجهزي الأكل للجداد بكل هذا التفاني والاخلاص ...!! ) ...!!! غايتو الكويسة أنو الحاجه ماعارفاها بتقول في شنو ...!!! كان كفت ليها الصينية دي في نص راسا .....!!! هو الناس ما أكلو....!!! الجداد الماكل ليها شنو ...!!! ياكل السم .....!!
بس الجداد باللفليف والحوامة الكتيرة .... زهج ليك حاجة ( الروضة ) دي ....وأفقدها التركيز في عملية (التوريق ) ....شالت ليك السفنجة دي ورزعتو ليك ...قولة ...!! فننننننن ...السفنحه لما جابت هوا ....!! ومؤثر صوتي مصاحب كرررر....!!! يكرك المرض ...!!!
الجدادة دي طارت فوووق 🕊 وهي في الجو اخدت يمين ...!! جلت السفنجة دي بي تلاتة سنتمترات ..!! وقامت جارية ...!!
والله اللقطة دي ده لو عادوها بالبطيء الأمريكان ذاتو كان فهمو حاجه ....) ...!!! يمين سلاح الجو مابيعمل التفاف ذي ده ...!! اها (سماهر ) قايلا حبوبتا دي بتلاطف في الجداد بالحركة دي ....!!! ( تشيل وتتبسم ...!! )..لأنو ببساطة الجدادة تاني جات راجعة ...!! وبعد( القصف ) ده كلو ....!! غايتو ( الجدادة ) ذاتا بالغت ...!! ( حلب ) ماقصفوها بالطريقة دي ...!! حلات سماهر قالت كيف يضربو ليها الشباك ...اها الجدادة دي هسا ضربوها (نووي ) قدامك ياها دي ماخدا الموضوع عااادي والحالة واحده ...!! وتحس بيها ذاتا مبتسمة ومتماسكا كدا ... وجات تاااني تهابش ...!! وبكره برضو حتجي ....!!! وتتحاوم في نفس المكان ....!!!
جدادنا ذاتو (حنين ) ياخ ...!!!
...اها عكرمة ود قسوم جري مشي كلم الكجم ...!! انتو ( جري مشي ) دي شنو البنقولا دي ....!!! ؟؟
ماهو ياجري ...يامشي ،..لكن ( جري ومشيان ) ...!! 😳 كيف ..!!؟؟ ( فقط في السودان ...) ....!!! ماعلينا ....المهم عكرمة جري مشي كلم الكجم ( تاااااني ) ...!! قال ليهو جابو لينا بت من أمريكا عندها حاجات أكتر من الدكان ...الكجم اصلو ماكضب ولا أتلفت طوالي جا طاير ...يتلفت ذي الحرامي ....سلم عليها...!!! وتكل جنبها....!!! كاتل ضلو وعامل حميل ....( المجرم) ....!! والبنطلون مشروط ...!!!
لما حننا....!!
( فربتت ( سماهر ) علي شعره بلطف وحنان ...) ...!!!
والله (الكجم ) أمو الولدتو ما أظن هبشت شعرو ده قريب ...!!! قرب ينوم .....!!! اها وكت القعدا طالت وزهج ...طوالي خشي في المحشي...!!! قال ليها قالو عندكم حاجات ...!!؟؟ مافهمت كلامو .....!!! اها ناس (كجمنتو ) ديل ما بتعطلو كتير...!!! طوالي أشر ليها علي الشنط .....( هي كمان مستقبلاهو جوه الاوضة التقول السفير الفرنسي ......!! ) ...
غايتو الكويسة انها فهمت طوالي ...!!! طلعت ليك البسكويت والشوكولاتة ...!!!
والكجم اتشلهت ...!!!
يمطق ...!!! داير يغمر ....
( الشوكولاتة ادوها الجداد يايابا لمن إنتا ) ....!!! قالو يوم أدت الجداده (شوكلاتة ) البيت ده كلو بضحك بما فيهم( الجدادة ) ذاتا ....!!
المهم الكجم لفح ليك الحاجات في الجو ذي الحاوي ...وختا ليك رجلينو ديل في نص راسو وانطلق يعدو ....جري ( العدو )....!!! شكرًا ماقالا للبت ....(الملعون ) ...!!! تشيل وتمسح فيهو ...ووراهو طوالي انطلق ( الوسيط الامريكي ) ( عكرمة ) ماهو ده الجابو وداير حقو ناشف ...!! والكجم غنج وزاغ ....!!! وعكرمة في خطراتو ...!!! بالله دي ولادة دي ....!!! الله يديهم العافية بس ...!!
اها سماهر مرقت سألتم قالت ليهم انتو ( الواي فاي) حقكم ( الباسوورد ) بتاعو كم ...!! قسوم قال بِسْم الله.....!!!! قايلو ( شيطان ) ....!! أولادو عرفوهو ...!! يعاينو لي بعض ويضحكو ...واحد فيهم قال ليها هو ذاتو وينو عشان يفتحو....!!!
( انها الأمنيات عندما تلامس السقف )..( ولسان حالهم يقول من أين أتت هذه الشقية ...) ....!!!
اها دي كمان تمت ليها الناقصة ...!!! الصدمة الأولي كانت لماعرفت إنّو الكهربا بتقطع ...!!! اها اول يوم تحضر الكهربا قطعت ....كاااااك صرخت ...قالت ....!!!
What happened I felt that I had become blind
ترجمو للروضة حبوبتا كلاما ده قالو ليها لما الكهربا قطعت ( سماهر ) خافت قالت أمكن بقت عميانه ...
الروضة ضحكت لما انتكت ...!! قالت غايتو ( انصاف ) بتي دي ماعندها (بطان ...!! ) ..!! عمي كباسا يا يما ....!! عليك الله شوفو جنس المغسة دي ....!!
المهم سماهر يبدو انها اقتنعت انها لن تستطيع الصمود كثيراً في السودان الرحيب ...!!! لكن كمان مابنفع تقول لي اهلها انو اهلكم ديل مانفعو معاي....وانا دايرة...!! ( نت ) ..( وكهربا ) وكلام ذي ده ....!! لكن ( سماهر ) تعلمت من الأمريكان كيفية الوصول الي الهدف ...!!! وتحقيق المطالب .....!!!
طوالي لمت ليك في ود قسوم الوسطاني دا اسمو ( مصطفي ) اخدت معاهو ذي عشرة دقايق كدا ...!! ورتو بالظبط دورو شنو في معركتا الجاية دي ....!! ( معركة العودة الي احضان العم سام .....!! )
جهزت كل شي واتصلت بي أمها علي ( سكايب ) وقَعَدت تحكي معاها...!!! اول حاجه ورتا الاوضة والحاجات ...!!! وأمها بتوصي فيها إنّو خليك بت جدعة وقدر المسؤولية وانو هي مقدرة حجم النقلة الحاصلة ....لكن قالت ليها لازم تتأقلمي وانو ثقتي فيك كبيرة ...!!! والحياة أصلا تجارب وخبرات ولازم تصمدي ...!! وأنها مابتشك لحظة في عزيمتا واصرارا....!!!
(هياااا اخوانا البت دي ( ماشه ( الفلوجه ) ولا شنو ...!!!؟؟؟
اها بي هنا ( سماهر ) مشتا لي أمها ذي ماهي دايرا وزادتا ليك كم كوز من عندها...!!! قالت ليها أنا مبسوطة شديد هنا ياماما ...!!! حتي الانترنت الكنتا مدمناهو خففتا منو كتير ...!! وأمها تشيل وتتبسم ....!! واحست بتحقيق جزء من أهداف العودة الي السودان...!! ايوه كدا ياسمسمة عجبتيني ...!! ركزي في قرايتك ...!!! وسماهر مواصلة ... ....!! قالت ليها وناس حبوبة ذاتم طلعو ظريفين شديد واولادم
... (They are so cute ) ..!! ( الكيوت ديل ناس عكرمة ) مخيتين الحلة كلها هو والكجم في صندوق بسكويت ...!!
وحكت ليها عن (قسوم) وانو كيف هو راجل لطيف وجدع وكلو ذوق ....!!! اصلو ماجابت ليها سيرة إنّو لقتو مره نايم في اوضتا قال أبرد من الجامع ....!!!
ودست منها لما صحت مره ولقتم بحكو عن الحرامي التلب بالليل مالقي حاجه في الحوش ..!! فتح قفص الجداد ..والديك نقرو ....!!! وميتين بالضحك ...!!!
المهم قالت لي أمها اطمئني ان شاء الله أنا علي العهد ...!! (علي العهد) دي قالتا بالعربي الفصيح وقوية كدا...!!! أمها دايرا تزغرد (جابت ليها لغة عربية كمان ....!! )
اها أمها دايرا تودعا كدا قالت ليها... ماما.. !! ماما... !! دقيقة ماتقفلي ده (مصطفي ) وَد قسوم داير يسلم عليك ....!! نادتو قالت ليهو ايوا تعال يابيبي...( طبعا دي اول في حياتو زول يقولو ليهو يابيبي ....!!! وآخر مره ) ....
قالت ليهو اها عاين هنا في الكاميرا وسلم علي ماما ...!!!
قسوم يضاحك بدون سبب مستغرب في البث المباشر ده .....!!! قال ليها نحنا في التلفزيون ....!!؟ أدتو ليك قرصة قالت ليهو سلم ...سلم
say hiiii
سي هاااي .....!!!!
قال ليها ازيك ياخالتو ( انصاف ) (ده اسم أم سماهر ) ....!! ( أسامي كلها شركة ...!! ) .....
قالت ليهو اهلًا اهلًا يامصطفي ...إنتا كويس ...!!
تاني ضحك مستغرب في القصة دي ...!!
قال ليها كويس ....!!
قالت ليهو اها ...!!! سماهر حلوة ومبسوطة معاكم ..!!؟
بس قال ليها كلام كدا ...طوالي الخط قطع وصوت كركبة كدا.... !!!؟؟؟
بعدها بي اقل من أسبوع سماهر كانت في أمريكا وفِي نص (تكساس ...) ✈
طبعا نفسكم تعرفو (سماهر ) دي رجعت كيف ....!! ومصطفي كان دورو شنو .....!!؟
اها مستعدين للقنبلة ...!!!
النوريكم إذن ...ونحدثكم ....
مصطفي قال لي أمها أربعة كلمات مازادم ...!!
(حفظتم ليهو البت دي ....)
مصطفي قال لي أمها ....
(سماهر بتدرسني كتب ( داعش ...) ...!! 😳😳😳
بس كدا اصلو مازادا ....!!! طوالي الخط قطع ....!!! ( وقطعو ) معاهو تذاكر العودة ل ( سماهر ) في ذات التوقيت ...
شفتو البت دي طلعت معلمة كيف .....!!!
حتي جملة ( وانشاءالله علي العهد ) القالتا دي برضو كانت قاصداها .....!!! أمها ذاتا قلبا اكلا من اللغة العربية دي ...(ياها لغة الجماعة ...) ...!!! اي حاجة كانت محسوبة....!! ماقلتا ليكم تربية أمريكان ...تحسبو لعب ....!!!
كمان (المجرمة ) بعد ماوصلت هناك بكل براءة قالت لي اَهلها لييي رجعتوني ياخ ...!!!! السودان (حلوة ) شديد ....!!! ( السودان طلع مؤنث ....!!! زغردي يالروضة .....!! )
قالو ليها مافي كلام ذي ده تاني رجلنا علي رجلك ....!!
قالت لهم وقد اطرقت رأسها الي الارض في أسي وحزن
طبعا البتشوفوهو ....!! واكيد انتو ادري بمصلحتي حتي اكتر مني أنا ذاتي ....!! وفِي محياها ابتسامة رضا ...!! (وإبليس ) يتابع باهتمام ) ...!!!
غادرت سماهر الي ( تكساس ) وتركت غرفتها ( لاحلي ناس ...!!!)
رمضان كلو متجدعين نايمين فيها ...وقد وسعتهم وتبقي منها الكثير ....انها النفوس عندما تطيب ...!!
وفِي الْيَوْمَ الأخير باعو ال LG خوفا من رمي (الجمرات ) ....!! وتقاسمو ثمنة (الفرح ) ...بعد ان تبرعت به أسرة سماهر ...!! والبيت كلو ( عيد) كما لما يعيد من قبل ...!!! والضحكات تملأ المكان ..!! وتلون الجدران .....!!
انه الرضا والقناعة والتصالح مع الذات ....!!
( اها دي صعبة شوية عندكم في أمريكا ياسوسو ...) ... !!
ده ياهو كود ( الواي فاي ) بتاع ناس ( قسوم ) السألتي منو يا سماهر ....!!! بدون فاتورة وشاراته لاتنقطع .....!!!
فقط يوصل الطيبة والبساطة وصوت الضحكات .....
عرفتيهو ...!!؟؟
بس لوسمحت ممكن سؤال ياست البنات....!!!؟؟؟
أو زي ما إنتي بتحبي
Is it possible to ask you question..!??
(واي فايكم ) كم أرقامو بسراع قوليهم ليا !!؟؟
رقم الباسوورد ( ياسمهر ) قوليهم لي يابنيه
لو درتي رقم ( واي فاينا ) ..!! أرقامو بسيطة هدية
(واي فاينا ) بدون (باسوورد ) بفتح كدا بس بالنية
فاتح علي شارع النيل ...في كل ركن وزقاق
شاراتو قوية بتدخل.... بين الضل والرقراق
شايل جواهو محنة.......ريده... وحبة أشواق
( واي فايكم ) كم مفتاحو قوليهو سريع يابنيه
( واي فاينا ) بدون مفتاح فاتح علي ضَل نفاج
بفتح للكل أبوابو ..... وبمسح عرق المحتاج
وأي فاينا لقيمه هنية (والروضة ) تعوس في الصاج
بن قهوة .....وشاي المغرب ....واللمة هناك عصرية
( واي فاينا) بدون (باسوورد ) فاتح للكل حنفية
بتنقط موية المطرة.... !!
بتكب فرحة وحنيّة
هاك ( الباسوورد) يالغالية .....!!!
بتجينا متين يابنية ...!!؟؟
نورتينا ياسماهر ...
انتهي
تعليقات
إرسال تعليق